कोंढव्यातील संगणक अभियंत्याच्या लॅपटॉप, मोबाईलमधून माहिती उघड; ३ जानेवारीपर्यंत पोलीस कोठडी
महाराष्ट्र न्युज नेटवर्क
पुणे : अल कायदा इन इंडियन सब-कॉन्टिनेंट (AQIS) या दहशतवादी संघटनेच्या समर्थनार्थ जिहादचा प्रसार आणि प्रचार करण्याच्या आरोपाखाली अटक करण्यात आलेल्या कोंढव्यातील संगणक अभियंता जुबेर हंगरगेकर याचा अफगाणिस्तान आणि हाँगकाँगशी कनेक्शन उघड झाले आहे. विशेष न्यायालयाने अधिक तपासासाठी त्याला ३ जानेवारीपर्यंत एटीएस कोठडी मंजूर केली आहे.
एटीएसने पुण्यातील १९ ठिकाणी छापे घालून अनेक देशविरोधी साहित्य हस्तगत केले होते. त्यातून जुबेर इलियास हंगरगेकर (वय ३२) याचे नाव समोर आले. त्यानंतर त्याला पुणे स्टेशन परिसरातून २७ ऑक्टोबर रोजी अटक करण्यात आली होती. त्याच्याकडील इलेक्ट्रॉनिक साधने जप्त करण्यात आली होती. जुबेर हंगरगेकर यांच्या मोबाईलमध्ये एक पाकिस्तानी क्रमांक आढळून आला होता. जुबेरच्या मोबाईल आणि लॅपटॉपचे फॉरेन्सिक लॅबमध्ये विश्लेषण केल्यानंतर मोठी माहिती समोर आली आहे.
ठाणे जिल्ह्यातील पडघा येथे जाऊन तरुणांना भारताविरुद्ध भडकाऊ भाषणे केल्याचे अनेक पुरावे समोर आले आहेत. पडघा परिसराला ‘ग्रेटर सिरीया’ अशी ओळख बनविण्याचा काही जणांचा हेतू असल्याचेही तपासात उघड झाले आहे.
जुबेर हंगरगेकर याच्याविरुद्ध बेकायदा हालचाली प्रतिबंधक कायद्यान्वये (UAPA) गुन्हा दाखल करण्यात आला आहे. या कायद्यानुसार आरोपीविरुद्ध ३० दिवसांची पोलीस कोठडी मिळू शकते. हंगरगेकर याची यापूर्वी १८ दिवसांची पोलीस कोठडी घेण्यात आली होती. त्याच्याकडील इलेक्ट्रॉनिक वस्तूंचे तांत्रिक विश्लेषण बाकी असल्याने एटीएसने पोलीस कोठडीचा अधिकार राखून ठेवत त्याची न्यायालयीन कोठडीत रवानगी केली होती.
त्यानंतर एटीएसने वॉरंट घेऊन जुबेर हंगरगेकर याला बुधवारी विशेष न्यायालयात हजर केले. अतिरिक्त सरकारी वकील राजेश कावेडिया यांनी न्यायालयात सांगितले की, जुबेरच्या टेलिग्राम ग्रुपमधील १०२ आयडींपैकी ४ आयपी अॅड्रेस मिळाले आहेत. त्यातील ३ आयपी अॅड्रेस अफगाणिस्तानमधील असून १ आयपी अॅड्रेस हाँगकाँगमधील आहे.
त्याच्याकडील डिजिटल साधनांमधून त्याचे थेट आंतरराष्ट्रीय दहशतवादी नेटवर्क, विशेषतः अफगाणिस्तान, हाँगकाँगशी संबंधित मॉड्यूल आणि पडघा गावाशी जोडलेले असल्याचे स्पष्ट झाले आहे. जुबेरच्या मोबाईल आणि लॅपटॉपमधून Al Qaeda in Indian Subcontinent Manifestation आणि Inspire Magazine आढळली आहेत. त्यामध्ये AK-47 संदर्भातील गन स्किल ट्रेनिंगचे फायरिंग फोटो तसेच स्फोटके तयार करण्याची सूत्रे असलेली पुस्तके मिळाली आहेत.
त्याच्या साथीदाराच्या झडतीत १२ मोबाईल, ६ लॅपटॉप, एक पेनड्राइव्ह तसेच २ लाख ३५ हजार रुपये मिळाले. जप्त करण्यात आलेल्या इलेक्ट्रॉनिक साधनांमध्ये १ टीबीपेक्षा अधिक डेटा असून त्याचे विश्लेषण सुरू आहे. त्या विश्लेषणातून मिळालेल्या माहितीसंदर्भात जुबेरची चौकशी करायची असल्याने एटीएसने पोलीस कोठडीची मागणी केली. विशेष न्यायाधीश पी. वाय. लाडेकर यांनी त्याला ३ जानेवारीपर्यंत एटीएस कोठडी मंजूर केली आहे.
सोलापूरात शिक्षण, पुण्यात नोकरी
जुबेर हंगरगेकर हा सॉफ्टवेअर इंजिनिअर असून गेल्या १५ वर्षांपासून पुण्यातील हिंजवडी आणि कल्याणीनगर येथील नामांकित आयटी कंपन्यांमध्ये नोकरी करत आहे. त्याने सोलापूर सोशल असोसिएशन उर्दू हायस्कूलमध्ये शिक्षण घेतले. त्यानंतर सोलापूरच्या वालचंद इन्स्टिट्यूट ऑफ टेक्नॉलॉजीमधून बी.ई. पदवी प्राप्त केली. पुण्यातील आयटी कंपनीत नोकरी करत असतानाच त्याचे मुख्य काम दहशतवादी संघटनांसाठी कट्टरपंथी तरुण तयार करणे व टेलिग्राम ग्रुपद्वारे अतिरेकी सामग्री प्रसारित करणे हे होते. भारतात खिलाफ आणण्याचा आणि शरियत प्रस्थापित करण्याचा हा एकमेव मार्ग आहे, असे तो तरुणांच्या मनावर बिंबवण्याचा प्रयत्न करत होता.
