लष्कर पोलिसांनी तीन दुकानांतील चोऱ्या उघडकीस आणून ३ लाखांचा माल केला जप्त
महाराष्ट्र न्युज नेटवर्क
पुणे : लष्कर भागातील महात्मा गांधी रस्त्यावरील कपड्याच्या दुकानाचा दरवाजा उचकटून महागडे कपडे व इतर वस्तूंची चोरी करणाऱ्या अल्पवयीन मुलांच्या टोळीला लष्कर पोलिसांनी पकडून त्यांच्याकडून ३ लाख रुपयांचा माल जप्त केला आहे. त्यांच्यातील एकाला अटक करण्यात आली आहे.
निर्मल सोनार (वय १८, रा. नेपाळ) असे या आरोपीचे नाव आहे. लष्कर भागातील एम. जी. रोडवरील मेड फॉर मेन या कपड्याच्या दुकानातून ५८ हजार रुपयांचे महागडे कपडे चोरीला गेले होते. याबाबत ५ जानेवारी २०२६ रोजी फिर्याद दाखल करण्यात आली होती.
या तक्रारीच्या अनुषंगाने पोलिसांनी परिसरातील सीसीटीव्ही फुटेजची तपासणी केली. पोलिस अंमलदारांनी तांत्रिक विश्लेषण करून निर्मल सोनार व त्याच्या तीन अल्पवयीन साथीदारांना ताब्यात घेतले. त्यांच्याकडून चोरीच्या गुन्ह्यात वापरलेल्या दोन दुचाकी तसेच इतर गुन्ह्यांत चोरी केलेला एक लॅपटॉप, ए.सी.मध्ये वापरली जाणारी तांब्याची पाइप, कटावणी आणि चोरी केलेले कपडे असा एकूण ३ लाख ५ हजार रुपयांचा माल हस्तगत करण्यात आला आहे. लष्कर परिसरातील एकूण तीन गुन्हे उघडकीस आणण्यात आले आहेत.
ही कामगिरी पोलीस उपायुक्त राजलक्ष्मी शिवणकर यांच्या मार्गदर्शनाखाली वरिष्ठ पोलीस निरीक्षक गिरीशकुमार दिघावकर, पोलीस उपनिरीक्षक राहुल घाडगे, देशमुख, तसेच पोलीस अंमलदार महेश कदम, अतुल मेगे, सोमनाथ बनसोडे, संदीप उकिरडे, प्रविण गायकवाड, सागर हराळ, लोकेश कदम आणि अमोल कोडिलकर यांनी केली आहे.
