दरोडा व वाहनचोरी विरोधी पथकाने सराईत गुन्हेगाराकडून १८ लाख ५० हजारांचा ऐवज केला जप्त
महाराष्ट्र न्युज नेटवर्क
पुणे : खरेदीच्या बहाण्याने सुपरमार्केटमध्ये येऊन महिलेच्या पिशवीत ठेवलेले सोन्याचे दागिने व रोख रक्कम चोरून नेणाऱ्या सराईत गुन्हेगाराला दरोडा व वाहनचोरी विरोधी पथकाने अटक केली. त्याच्याकडून १८ लाख ५० हजार रुपयांचा ऐवज जप्त करण्यात आला आहे.
जयेश चंद्रशेखर खिच्ची (वय ३९, रा. साई सोसायटी, मांजरी खुर्द) असे अटक करण्यात आलेल्या चोरट्याचे नाव आहे. खिच्ची हा सराईत गुन्हेगार असून त्याच्यावर यापूर्वी हडपसर, चंदननगर, महाड शहर, वानवडी, कोंढवा, लोणीकंद पोलीस ठाण्यात चोरीचे गुन्हे दाखल आहेत.
याबाबत एका महिलेने येरवडा पोलीस ठाण्यात फिर्याद दिली आहे. ७ जानेवारी रोजी येरवड्यातील जाधवनगर भागातील एका दुकानात तो खरेदीच्या बहाण्याने गेला होता. महिलेने शिलाई यंत्रावर एका पिशवीत दागिने ठेवले होते. महिलेचे लक्ष नसल्याची संधी साधून दागिने ठेवलेली पिशवी व रोख रक्कम चोरून नेली होती.
दरोडा व वाहनचोरी विरोधी पथक १८ जानेवारी २०२६ रोजी पेट्रोलिंग करीत होते. पोलीस अंमलदार राहुल इंगळे व प्रफुल्ल मोरे यांना बातमीदारामार्फत माहिती मिळाली की, एक व्यक्ती हडपसर माळवाडी येथील जुन्या कॅनॉलवरील पुलाजवळ सोने विक्रीसाठी त्याच्याकडील स्कुटरसह थांबलेला आहे.
या माहितीनुसार पोलिसांनी तेथे जाऊन जयेश खिच्ची याला पकडले. त्याची झडती घेतली असता त्याच्याकडे सोन्याचे मोठे मंगळसूत्र, लहान मंगळसूत्र, कानातील झुमके जोड व एक सोन्याची अंगठी असे १३८ ग्रॅम सोन्याचे दागिने व स्कुटर असा एकूण १८ लाख ५० हजार रुपयांचा माल जप्त करण्यात आला आहे.
ही कामगिरी अपर पोलीस आयुक्त पंकज देशमुख, पोलीस उपायुक्त निखिल पिंगळे, सहायक पोलीस आयुक्त राजेंद्र मुळीक यांच्या मार्गदर्शनाखाली पोलीस निरीक्षक छगन कापसे, सहायक पोलीस निरीक्षक सी. बी. बेरड, पोलीस उपनिरीक्षक एस. जे. तानवडे, पोलीस अंमलदार कैलास चव्हाण, राजू पुणेकर, परेश सावंत, गणेश लोखंडे, दत्तात्रय खरपूडे, मयूर सूर्यवंशी, राहुल इंगळे, प्रफुल्ल मोरे, विनायक येवले, संदीप येळे, विक्रांत सासवडकर यांनी केली आहे.
