दरोडा व वाहन चोरीविरोधी पथकाने १२ तासांत आरोपींच्या आवळल्या मुसक्या
महाराष्ट्र न्युज नेटवर्क
पुणे : एकाला दिलेल्या पैशाची वसुली करण्यास मित्राने सांगितले होते. त्यातील काही रक्कम त्याने वसूलही केली. या पैशांच्या वादातून मित्राने साथीदारांच्या मदतीने मित्राच्या डोक्यात दगड घालून, चेहरा विद्रूप करून खून केला. खून झालेल्याचे नावही निष्पन्न झाले नव्हते. असे असतानाही दरोडा व वाहन चोरीविरोधी पथकाने खून झालेल्याचे नाव निष्पन्न करून चौघा आरोपींच्या १२ तासांच्या आत मुसक्या आवळल्या.
राजेंद्र सुभाष ऐलगच्चे (वय ४०, रा. स्वराज आर्केड, आंबेगाव) असे खून झालेल्या तरुणाचे नाव आहे. पोलिसांनी शुभम राजेश शिंदे (वय २५, रा. ताकवले कॉम्प्लेक्स, सिंहगड रोड, नांदेड सिटी), लकी सुरेंद्र सिंग (वय २३, रा. खडकी अॅम्युनिशन फॅक्टरी), सुनील संतोष खलसे ऊर्फ एस.के. (वय १९, रा. संभानगर झोपडपट्टी, हिंगणे होम कॉलनी, कर्वेनगर) यांना अटक केली असून एका अल्पवयीन मुलाला ताब्यात घेतले आहे.
वारजे येथील आकाशनगरजवळील वन विभागाच्या टेकडीवरील सिमेंटच्या विसाव्याच्या शेजारील निर्जन जागेत एका व्यक्तीचा मृतदेह वारजे पोलिसांना २३ जानेवारी रोजी मिळाला होता. कोणीतरी त्याच्या शरीरावर ठिकठिकाणी मारहाण करून तसेच दगडाने चेहरा चेंदामेंदा करून त्याचा खून केला होता. त्याची ओळख पटली नव्हती. वारजे पोलिसांनी खुनाचा गुन्हा दाखल केला.
या गुन्ह्याचा गुन्हे शाखा समांतर तपास करीत होती. सहायक फौजदार बाळू गायकवाड व पोलीस अंमलदार साई कारके यांना बातमीदारांकडून माहिती मिळाली की, गणपती माथा ते शिंदे पूल, वारजे दरम्यान दोन संशयित थांबले असून त्यांच्या हालचाली व बोलण्यावरून त्यांनी काहीतरी गुन्हा केल्याचा संशय आहे.
या माहितीची खात्री करण्यासाठी पोलीस निरीक्षक दत्ताराम बागवे, सहायक पोलीस निरीक्षक वर्षा कावडे व पोलीस अंमलदार तेथे गेले. पोलिसांना पाहून ते पळून जाऊ लागले. त्यावेळी पोलिसांनी त्यांचा पाठलाग करून त्यांना पकडले. त्या दोघांना ताब्यात घेण्यात आले. त्यांच्याकडील माहितीनुसार अन्य दोघांनाही ताब्यात घेण्यात आले.
चौकशीत असे निष्पन्न झाले की, राजेंद्र ऐलगच्चे यांनी एकाला १८ लाख रुपये दिले होते. ही रक्कम वसूल करून देतो, असे सांगून शुभम शिंदे याने सुमारे ११ लाख रुपये वसूल केले होते. हे पैसे राजेंद्र ऐलगच्चे मागत होते.
राजेंद्र ऐलगच्चे यांना संपविले तर पैसे द्यावे लागणार नाहीत, असे समजून शुभम शिंदे याने साथीदारांना पैशांची लालूच दाखवून मदतीला घेतले. राजेंद्र ऐलगच्चे यांना वारजे येथील शनी मंदिर टेकडी येथे २१ जानेवारी रोजी रात्री साडेआठ वाजता बोलावले. त्याप्रमाणे राजेंद्र ऐलगच्चे तेथे आले.
त्यावेळी शुभम व त्याच्या साथीदारांनी लोखंडी हत्याराने गळ्यावर, छातीवर, पोटावर व पायावर वार केले. डोक्यात दगड घालून त्यांचा चेहरा विद्रूप करण्यात आला. आरोपींना पुढील कारवाईसाठी वारजे माळवाडी पोलिसांच्या ताब्यात देण्यात आले आहे.
अपर पोलीस आयुक्त पंकज देशमुख, पोलीस उपायुक्त निखिल पिंगळे, सहायक पोलीस आयुक्त विजय कुंभार यांच्या मार्गदर्शनाखाली वरिष्ठ पोलीस निरीक्षक दत्ताराम बागवे, सहायक पोलीस निरीक्षक वर्षा कावडे, सहायक फौजदार बाळू गायकवाड, पोलीस हवालदार गणेश ढगे, निनाद माने, अजित शिंदे, प्रदीप राठोड, दत्तात्रय पवार, रवींद्र लोखंडे, रेहाना शेख, साधना पवार, पोलीस अंमलदार महेश पाटील, साईकुमार कारके, अमित गद्रे, शिवाजी सातपुते यांनी ही कारवाई केली आहे.
