अग्निशमन दलाकडून हॉटेलचे शटर तोडून स्वारगेट पोलिसांची कारवाई
महाराष्ट्र न्युज नेटवर्क
पुणे : लक्ष्मीनारायण चौकातील मोदी प्लाझा इमारतीच्या तिसऱ्या मजल्यावरील एलडिनेरो हॉटेलमध्ये अजब प्रकार उघडकीस आला. तेथे हुक्का पार्लर सुरू असल्याची माहिती मिळाल्यानंतर पोलीस घटनास्थळी पोहोचले. हॉटेलचे शटर आतून बंद होते. पोलिसांनी अग्निशमन दलाच्या मदतीने शटरचे कुलूप तोडून आत प्रवेश केला असता आत हुक्का पार्लर सुरू असल्याचे दिसून आले. तेथे तब्बल २० तरुणांना हुक्का पुरविला जात होता. पोलिसांनी या तरुणांना ताब्यात घेतले असून स्वारगेट पोलिसांनी हॉटेल मालक, मॅनेजर व कर्मचाऱ्यांवर कारवाई केली आहे.
एलडिनेरो हॉटेलचे मालक विकास मेहता (रा. चव्हाणनगर, धनकवडी), मॅनेजर सनी सुंदर परिहार (वय ३३, रा. गुलटेकडी, स्वारगेट) तसेच हॉटेलमधील वेटर दीपक सतभूषण जैन, मोसिन दिलमोहम्मद शेख, अनमोल सरवन श्रेष्ठ, पर्वत सुरज परिहार, ढोल बहादूर परिहार अशी गुन्हा दाखल झालेल्यांची नावे आहेत.
पोलीस नियंत्रण कक्षातून स्वारगेट पोलीस ठाण्याला कळविण्यात आले की, लक्ष्मीनारायण चौक येथील मोदी प्लाझा इमारतीमधील एलडिनेरो हॉटेलमध्ये हुक्का सुरू आहे. खात्री करून कारवाई करण्याचे आदेश देण्यात आले. त्यानुसार पोलीस निरीक्षक विकास भारमळ, पोलीस उपनिरीक्षक सुजाता जाधव, पोलीस अंमलदार टोणपे, कुडाळकर, ठोंबरे, मार्शल जाधव व साळवे हे तातडीने मोदी प्लाझा इमारतीतील तिसऱ्या मजल्यावर गेले.
एलडिनेरो हॉटेलचे शटर आतून बंद होते. शटर उघडण्यासाठी वारंवार आवाज देऊनही हॉटेलच्या आतून कोणताही प्रतिसाद मिळाला नाही. त्यामुळे पोलिसांनी अग्निशमन दलाला बोलावले. अग्निशमन दलाने हॉटेलच्या शटरचे लॉक तोडले. पोलिसांनी हॉटेलमध्ये प्रवेश केला असता आत ग्राहकांकडून रोख रक्कम घेऊन त्यांना तंबाखूजन्य हुक्का फ्लेवर ओढण्यासाठी कामगारांमार्फत विक्री केली जात असल्याचे आढळून आले.
हॉटेल मॅनेजर सनी परिहार याच्याकडे चौकशी केल्यानंतर त्याने हॉटेल मालक विकास मेहता यांच्या सांगण्यावरून वेटरमार्फत ग्राहकांना हुक्का सेवनासाठी देत असल्याचे कबूल केले. पोलिसांनी गुन्हा दाखल करून २२ हजार ५६० रुपयांचा माल जप्त केला आहे.
ही कारवाई पोलीस आयुक्त अमितेशकुमार, सह पोलीस आयुक्त रंजनकुमार शर्मा, अपर पोलीस आयुक्त राजेश बनसोडे, पोलीस उपायुक्त मिलिंद मोहिते, सहायक पोलीस आयुक्त धन्यकुमार गोडसे यांच्या मार्गदर्शनाखाली पोलीस निरीक्षक विकास भारमळ, पोलीस उपनिरीक्षक सुजाता जाधव, पोलीस अंमलदार टोणपे, कुडाळकर, ठोंबरे, जाधव व साळवे यांनी केली आहे.
