हॉटेल चालकाला पिस्तुलाचा धाक दाखवून वर्षभर उकळली खंडणी
महाराष्ट्र न्युज नेटवर्क
पुणे : मोक्का लावलेल्या दोन गुन्ह्यांमध्ये एकामागून एक जामीन मिळाल्यानंतर गँगस्टर टिपू पठाण व त्याच्या टोळीवर खंडणीचा आणखी एक गुन्हा दाखल करण्यात आला आहे. सय्यदनगरमधील एका हॉटेलचालकाकडून तो गेल्या एक वर्षापासून दरमहा पाच हजार रुपये खंडणी उकळत होता.
याबाबत नवाज मोहम्मद तांबोळी (वय ५४, रा. गुलामअलीनगर, मोहम्मदवाडी) यांनी काळेपडळ पोलीस ठाण्यात फिर्याद दिली आहे. त्यावरून पोलिसांनी रिजवान ऊर्फ टिपू सत्तार पठाण (रा. ख्वाजा मंझिल, सय्यदनगर, हडपसर), तन्वीर शकील शेख (रा. सय्यदनगर, हडपसर), इरफान नासीर शेख (रा. हडपसर), अजित ऊर्फ अंट्या महमंद हुसेन शेख (रा. सय्यदनगर, हडपसर), सद्दाम सलीम पठाण (रा. सय्यदनगर, हडपसर) व इतर ३ ते ४ साथीदारांविरुद्ध खंडणीचा गुन्हा दाखल केला आहे. हा प्रकार १ जानेवारी २०२४ ते १२ जानेवारी २०२५ दरम्यान घडला.
टिपू पठाण व त्याच्या टोळीवर जमीन बळकावून ती भाड्याने देणे व जीवे मारण्याची धमकी देणे अशा दोन गुन्ह्यांमध्ये मोक्काअंतर्गत कारवाई करण्यात आली होती. या प्रकरणात न्यायालयाने नुकताच टिपू पठाणसह सहा जणांना जामीन मंजूर केला आहे. त्यानंतर आता आणखी एक खंडणीचा गुन्हा दाखल झाला आहे.
पोलिसांनी दिलेल्या माहितीनुसार, फिर्यादी नवाज तांबोळी यांचे मोहम्मदवाडी येथील गुलामअलीनगरमध्ये ‘हॉटेल जमजम’ नावाचे हॉटेल आहे. ते गेली सात वर्षे हॉटेल व्यवसाय करीत आहेत. जानेवारी २०२४ मध्ये त्यांची ओळखीचा तन्वीर शेख हॉटेलमध्ये येऊन म्हणाला, “तुमचा धंदा चांगला चालला आहे आणि त्याचा नफा टिपू भाईला द्यावा लागेल, अन्यथा हॉटेल चालू देणार नाही,” अशी धमकी देऊन तो निघून गेला. त्यानंतर टिपू पठाणच्या टोळीतील सदस्य वारंवार येऊन खंडणीची मागणी करत होते.
११ जानेवारी २०२४ रोजी सायंकाळी तन्वीर शेख व इम्रान अफजल शेख हॉटेलमध्ये आले. त्यांनी टिपू पठाणला फोन करून फिर्यादीशी बोलायला दिले. त्यावेळी टिपू पठाणने दरमहा पाच हजार रुपये खंडणी देण्याची धमकी दिली.
१२ जानेवारी रोजी तन्वीर शेखने फिर्यादीस टिपू पठाणच्या कार्यालयात बोलावले. ख्वाजा मंझिल येथील कार्यालयात टिपू पठाण व त्याचे साथीदार उपस्थित होते. खंडणी देण्यास नकार दिल्यानंतर टिपू पठाणने साथीदारांना “याचे हातपाय तोडून टाका,” असे सांगितले.
घाबरून फिर्यादीने तत्काळ पाच हजार रुपये दिले. त्यानंतर टोळीचे सदस्य हॉटेलमध्ये येऊन पैसे न देता जेवण करणे व पार्सल नेणे, तसेच दरमहा पाच हजार रुपये घेऊन जाणे सुरूच होते. व्यवसायाच्या भीतीने आतापर्यंत तक्रार दिली नव्हती, असे फिर्यादीने नमूद केले आहे. सहायक पोलीस निरीक्षक अमित शेटे तपास करीत आहेत.
पिस्तुल दाखवून धमकी
फिर्यादी कार्यालयात गेल्यावर टिपू पठाणने टेबलाच्या ड्रॉवरमधील पिस्तुल काढून हातात घेत “माझे ऐकले नाही तर गोळी घालीन,” अशी धमकी दिली. त्यानंतर त्याने दरमहा पाच हजार रुपये खंडणी देण्याचा इशारा देत, “आमच्या टोळीतील कोणीही पैसे मागायला आला तर ठरल्याप्रमाणे रक्कम देत जा,” असे बजावले.
