दंडाचा मेसेज आल्यावर आधी खात्री करा, ती फाईल APK तर नाही : वाहतूक पोलिसांची सूचना
महाराष्ट्र न्युज नेटवर्क
पुणे : तुमच्या वाहनावर वाहतूक दंड केल्याचा मेसेज मोबाईलवर येतो. तुम्ही कधी वाहतूक नियमभंग केला, याचा विचार करत असतानाच त्या मेसेजवर क्लिक करता आणि त्याच वेळी सायबर चोरटे तुमच्या अकाऊंटचा ताबा घेऊन तुमचे बँक खाते रिकामे करतात. तेव्हा तुमच्या लक्षात येते की तुमची फसवणूक झाली आहे.
पुणे शहर वाहतूक पोलिसांनी गेल्या काही वर्षांमध्ये पुणेकरांवर वाहतूक नियमभंग प्रकरणी दंडात्मक कारवाई केली आहे. जवळपास ४१० कोटी रुपयांचा हा दंड थकीत राहिला आहे. या दंड वसुलीसाठी वाहतूक विभागाकडून १९ लाख ई-चलनाच्या नोटिसा पाठविल्या जाणार आहेत.
त्यामुळे वाहनचालकांना अनेक नोटिसा मिळू शकतात. अशा नोटिसा आल्यावर ती APK फाईल आहे का, हे अगोदर तपासावे. त्या मेसेजच्या शेवटी ‘APK’ असे लिहिलेले नसेल तरच त्यावर क्लिक करावे, असे आवाहन पोलिसांनी केले आहे.
वाहतूक नियमभंगाबाबत दंड प्रलंबित असलेल्या वाहनमालकांना दंड रक्कम भरण्याबाबत अधिकृत नोटीस देण्यात येत आहे. या नोटीसमध्ये नमूद केल्याप्रमाणे संबंधित वाहनमालकांनी ३० दिवसांच्या आत दंडाची रक्कम भरणे आवश्यक आहे.
जर निर्धारित मुदतीत दंड भरला गेला नाही, तर संबंधित वाहनचालकाचा ड्रायव्हिंग लायसन्स निलंबित करण्याचा प्रस्ताव प्रादेशिक परिवहन अधिकारी (RTO) यांच्याकडे पाठविण्यात येईल. अथवा संबंधित चलनाचा खटला न्यायालयात दाखल करण्यात येईल.
नोटीस कशी दिली जाणार?
वाहतूक नियमभंग करूनही ई-चलनाचा दंड न भरलेल्या वाहनमालकांना २६, २७, २८ फेब्रुवारी आणि १ मार्च या दिवशी वाहतूक पोलिसांकडून नोटीस पाठविण्यात येणार आहे. ही नोटीस वाहनमालकांच्या नोंदणीकृत मोबाईल क्रमांकावर MHPIH-G या अधिकृत शॉर्ट कोडवरून एसएमएसद्वारे पाठवली जाईल. या कालावधीव्यतिरिक्त वाहतूक पोलिसांच्या नावाने किंवा वाहनावरील दंड भरण्याबाबत येणारा कोणताही मेसेज संशयास्पद समजावा.
दंड भरण्याचा अधिकृत मार्ग
अधिकृत संकेतस्थळ : https://mahatrafficechallan.gov.in
पुणे ट्रॅफिक पोलीस अॅप (PTP)
जवळच्या वाहतूक विभागाच्या कार्यालयात जाऊन ई-चलन मशीनवर QR कोड, डेबिट किंवा क्रेडिट कार्डद्वारे दंड भरता येईल.
सायबर फसवणुकीपासून सावधान
वाहतूक पोलिसांकडून कोणतीही APK फाईल पाठविण्यात येणार नाही.
आपला OTP कोणालाही शेअर करू नये.
केवळ नोटीसमध्ये नमूद केलेल्या अधिकृत पेमेंट पद्धतीचाच वापर करावा.
संशयास्पद लिंक किंवा कॉल आल्यास त्वरित जवळच्या पोलीस ठाण्यात संपर्क साधावा.
मोहिमेचा उद्देश
या मोहिमेचा उद्देश नागरिकांना वाहतूक नियमांचे पालन करण्यास प्रवृत्त करणे, प्रलंबित दंडाची पारदर्शक पद्धतीने वसुली करणे आणि वाहतूक शिस्त अधिक सक्षम करणे हा आहे. पुणे शहरातील नागरिकांनी या उपक्रमास सहकार्य करावे आणि निश्चित मुदतीत दंड भरावा, असे आवाहन वाहतूक शाखेचे पोलीस उपायुक्त हिम्मत जाधव यांनी केले आहे.
Latest Articles
