भारती विद्यापीठ पोलिसांनी तरुणीसह तिचे वडील, बहिणीवर केला गुन्हा दाखल
महाराष्ट्र न्युज नेटवर्क
पुणे : मुंबईतील वस्तू आणि सेवा कर विभागातील (जीएसटी) उच्चपदस्थ अधिकाऱ्याला लग्नाचे आमिष दाखवून मोहजालात अडकवून ४२ लाख ८७ हजार रुपयांची फसवणूक केल्याचा प्रकार समोर आला आहे.
याबाबत मुंबईतील एका ४३ वर्षीय अधिकाऱ्याने भारती विद्यापीठ पोलीस ठाण्यात फिर्याद दिली आहे. त्यावरून पोलिसांनी नागपूर येथील तरुणी (वय ३५), तिचे वडील (वय ६५) व बहिण (वय ३८) यांच्याविरुद्ध खंडणी व फसवणुकीप्रकरणी गुन्हा दाखल केला आहे.
पोलिसांनी दिलेल्या माहितीनुसार, फिर्यादी हे नवी मुंबईतील बेलापूर येथे राहतात. जीएसटी अधिकाऱ्यांनी २०२३ मध्ये ‘भारत मेट्रिमोनी जीवनसाथी’ या संकेतस्थळावर नोंदणी केली होती. त्यावरून नागपूरमधील तरुणीने त्यांच्याशी ओळख करून घेतली.
या तरुणीने त्यांच्याशी लग्नाचा बहाणा करून त्यांना प्रेमाच्या जाळ्यात ओढले. फिर्यादी यांच्याशी स्वसंमतीने शारीरिक संबंध ठेवले. त्यानंतर पोलिसांकडे लैंगिक अत्याचाराचा गुन्हा दाखल करण्याची धमकी दिली. या तरुणीने व तिच्या वडिलांनी फिर्यादी यांना आयुष्यभर तुरुंगात सडविण्याची धमकी देऊन मानसिक त्रास दिला.
त्यांच्याकडून खंडणीच्या स्वरूपात तरुणीच्या वडिलांनी विविध बँका व पतसंस्थांचे कर्ज फेडण्यासाठी धमकावून पैसे घेतले. तरुणीच्या बहिणीने सोने गहाण कर्ज बळजबरीने फेडण्यासाठी तसेच इतर वस्तू व चैनीसाठी फिर्यादीकडून धमकावून पैसे घेतले.
फिर्यादीकडून एकूण ४२ लाख ८७ हजार ९६५ रुपये घेतले होते. फिर्यादी यांनी या तरुणी, तिचे वडील व बहिण यांना पैसे व इतर वस्तू देणे बंद केले. त्यानंतर त्यांनी फिर्यादीवर लैंगिक अत्याचाराचा गुन्हा दाखल करण्याची धमकी दिली. फिर्यादीला त्रास न देण्यासाठी आणखी ७ लाख रुपयांची मागणी करून आर्थिक पिळवणूक केली. सहायक पोलीस निरीक्षक विश्वास भाबड पुढील तपास करीत आहेत.
