पोलीस आयुक्त अमितेश कुमार यांची कारवाई : चंद्रपूर कारागृहात रवानगी
महाराष्ट्र न्युज नेटवर्क
पुणे : वडारवाडीमध्ये दहशत माजविणाऱ्या विटकर टोळीतील अजय विटकर याला पोलीस आयुक्त अमितेश कुमार यांनी एमपीडीए कायद्यान्वये एक वर्षासाठी चंद्रपूर कारागृहात स्थानबद्ध केले आहे. काही महिन्यांपूर्वी याच अजय विटकरचा भाऊ विजय विटकर यालाही पोलीस आयुक्तांनी बुलढाणा कारागृहात स्थानबद्ध केले होते.
अजय चंद्रकांत विटकर (वय २४, रा. हरिहरेश्वर सोसायटीसमोर, जुनी वडारवाडी) असे कारवाई करण्यात आलेल्या सराईत गुन्हेगाराचे नाव आहे. अजय आणि विजय विटकर या विटकर टोळीची वडारवाडी परिसरात दहशत आहे. त्यामुळे काही महिन्यांपूर्वी पोलीस आयुक्त अमितेश कुमार यांनी विजय विटकर याच्यावर एमपीडीए कायद्यान्वये कारवाई करून त्याला बुलढाणा कारागृहात एक वर्षासाठी स्थानबद्ध केले होते.
अजय विटकर याच्याविरुद्ध चतु:श्रृंगी पोलीस ठाण्यात जीवघेण्या हत्यारांसह खुनाचा प्रयत्न, जबरी चोरी, बेकायदा शस्त्र बाळगणे यांसारख्या गंभीर गुन्ह्यांची नोंद आहे. मागील पाच वर्षांत त्याच्याविरुद्ध आठ गुन्हे दाखल झाले आहेत. २०२२ मध्ये त्याच्या टोळीवर मोक्का अंतर्गत कारवाई करण्यात आली होती.
वडारवाडी परिसरात त्याची दहशत असल्याने तत्कालीन पोलीस उपायुक्त हिम्मत जाधव यांनी नोव्हेंबर २०२४ मध्ये त्याला पुणे जिल्ह्यातून तडीपार केले होते. असे असतानाही तो पुन्हा वडारवाडीमध्ये आल्याचे समजल्यावर पोलिसांनी सापळा रचून त्याला वडारवाडीतील पठाण गल्लीत गेल्या वर्षी पकडले होते.
त्यावेळी त्याच्याकडे एक गावठी कट्टा आणि दोन जिवंत काडतुसे सापडली होती. त्यांच्या दहशतीमुळे चतु:श्रृंगी पोलीस ठाण्याचे वरिष्ठ पोलीस निरीक्षक उत्तम भजनावळे यांनी एमपीडीए कायद्यान्वये कारवाईचा प्रस्ताव पोलीस आयुक्तांकडे सादर केला होता. पोलीस आयुक्त अमितेश कुमार यांनी या प्रस्तावाची पडताळणी करून अजय विटकर याला एक वर्षासाठी चंद्रपूर कारागृहात स्थानबद्ध करण्याचा आदेश दिला आहे.
ही कारवाई पोलीस आयुक्त अमितेश कुमार, सहपोलीस आयुक्त रंजनकुमार शर्मा, अपर पोलीस आयुक्त मनोज पाटील, पोलीस उपायुक्त चिलुमुला रजनिकांत, सहायक पोलीस आयुक्त विठ्ठल दबडे यांच्या मार्गदर्शनाखाली वरिष्ठ पोलीस निरीक्षक उत्तम भजनावळे, पोलीस निरीक्षक अश्विनी ननवरे, सहायक पोलीस आयुक्त अनिकेत पोटे, अमोल धस, पोलीस उपनिरीक्षक उमेश कोळी, महिला पोलीस हवालदार जाधव, पोलीस अंमलदार संदीप ठोसर, पालांडे, हवालदार वाघवले, मोमीन, दांगडे, शिर्के, तांदळे, गिरंगे आणि कांबळे यांनी केली.
