लोणीकंदमधील घटना : आयटी इंजिनिअर पतीसह चौघांवर गुन्हा दाखल
महाराष्ट्र न्युज नेटवर्क
पुणे : पुण्यात नोकरी करणाऱ्या आयटी इंजिनिअर मुलाचे स्थळ पाहून मुलीच्या वडिलांनी आपली जमीन विकून मुलीचे थाटामाटात लग्न लावून दिले. लग्नाअगोदर फर्निचरसाठी २ लाख रुपये दिले. लग्नानंतर कारसाठी ५ लाख रुपये दिले. असे असतानाही घराच्या इंटेरियरसाठी माहेरहून २० लाख रुपये आणावेत, यासाठी होणाऱ्या छळाला कंटाळून विवाहितेने लग्नानंतर वर्षभराच्या आत गळफास घेऊन आत्महत्या केली. लोणीकंद पोलिसांनी आयटी इंजिनिअर पतीसह चौघांवर हुंडा प्रतिबंधक कायद्याखाली गुन्हा दाखल केला आहे.
वैष्णवी यशवंत लाटे (वय २२, रा. बकोरी रोड, लोणीकंद) असे विवाहितेचे नाव आहे. याप्रकरणी तिची आई गंगाबाई अशोक जामकर (वय ४८, रा. बीड) यांनी लोणीकंद पोलिसांकडे फिर्याद दिली आहे. त्यावरून पती यशवंत शिवनाथ लाटे (वय २८), सासू सखुबाई शिवनाथ लाटे (वय ५०), सासरा शिवनाथ महादेव लाटे (वय ५५), दीर सुरज शिवनाथ लाटे (सर्व रा. गोकुळ पार्क फेज २, बकोरी रोड, लोणीकंद) यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, यशवंत हा आयटी इंजिनिअर आहे. दोन्ही कुटुंबे बीडमधील रहिवासी आहेत. यशवंत आणि वैष्णवी यांचा विवाह ७ मे २०२५ रोजी बीड जिल्ह्यात झाला होता. लग्नापूर्वी जामकर कुटुंबीयांनी लाटे कुटुंबाला फर्निचरसाठी २ लाख रुपये दिले होते. त्यानंतर जमीन विकून वैष्णवीचे लग्न लावून दिले.
सासरी आल्यानंतर वैष्णवीचा छळ सुरू झाला. कारसाठी ५ लाख रुपये माहेरहून आण, अशी मागणी होऊ लागली. वैष्णवीची आई व मोठ्या बहिणीने ५ लाख रुपये लाटे कुटुंबाला दिले. त्यानंतर तरी सासरी वैष्णवीला चांगली वागणूक मिळेल, असे त्यांना वाटत होते.
काही दिवसांनंतर वैष्णवीचा पुन्हा छळ सुरू झाला. घराच्या इंटेरियरसाठी माहेरहून २० लाख रुपये घेऊन ये, असे सांगून तिचा छळ सुरू झाला. पैसे आणले नाहीत तर मी दुसरे लग्न करेन, अशी यशवंत लाटे याने वैष्णवीला धमकी दिली. सासू-सासरे व दीरही तिला धमकावत होते.
या सर्व छळाला कंटाळून वैष्णवी हिने शनिवारी, १४ मार्च रोजी सकाळी बेडरूममध्ये गळफास घेऊन आत्महत्या केली. वरिष्ठ पोलीस निरीक्षक सुनिता रोकडे तपास करीत आहेत.
