विवाहाच्या आमिषाने २६ लाखांना गंडा : मॅट्रोमोनिअल साइटवर फेक अकाउंटवरून फसवणूक
महाराष्ट्र न्युज नेटवर्क
पुणे : देशातील नामांकित अवकाश संशोधन संस्थेत (इस्त्रो) वरिष्ठ शास्त्रज्ञ असल्याची बतावणी करून महिलांची फसवणूक करणाऱ्या तोतयाला येरवडा पोलिसांनी अटक केली. आरोपी विवाहविषयक संकेतस्थळावरून महिलांशी ओळख करून त्यांची फसवणूक करत असल्याचे तपासात उघडकीस आले आहे.
आदर्श प्रशांत म्हात्रे (वय ३४, रा. अलिबाग, जि. रायगड) असे अटक करण्यात आलेल्याचे नाव आहे. आरोपी म्हात्रे स्वप्नील वारुळे, हेमंत गायकर, जयेश पाटील अशी बनावट नावे सांगून महिलांची फसवणूक करत होता.
याबाबत एका महिलेने येरवडा पोलीस ठाण्यात फिर्याद दिली आहे. आरोपीची फिर्यादी महिलेशी विवाहविषयक संकेतस्थळावरून ओळख झाली होती. म्हात्रे याने अवकाश संशोधन संस्थेत वरिष्ठ शास्त्रज्ञ असल्याची बतावणी केली होती. त्यानंतर त्याने महिलेला विवाहाचे आमिष दाखविले. महिलेच्या मुलीचा सांभाळ करतो, असे त्याने तिला सांगितले.
त्यानंतर त्याने महिलेकडे मुलीच्या भविष्यासाठी शेअर मार्केटमध्ये गुंतवणूक करायची असल्याचे सांगून एका बँकेकडून २६ लाख ५० हजार रुपयांचे कर्ज काढायला लावले. हे पैसे मिळाल्यानंतर त्याने महिलेशी संपर्क टाळण्यास सुरुवात केली. फसवणूक झाल्याचे उघडकीस आल्यानंतर तिने १० जानेवारी २०२६ रोजी पोलिसांकडे तक्रार दिली होती. त्यानंतर पोलिसांनी या प्रकरणाचा तपास सुरू केला.
तपासात म्हात्रे हा वेगवेगळ्या नावांनी महिलांची फसवणूक करत असल्याची माहिती मिळाली. तो नवी मुंबईतील रबाळे पोलीस ठाण्यातील गुन्ह्यात अटकेत असल्याची माहिती मिळाली. त्यानंतर येरवडा पोलीस ठाण्याच्या पथकाने त्याला फसवणुकीच्या गुन्ह्यात ताब्यात घेऊन अटक केली. या प्रकरणाचा तपास शाखेचे पोलीस निरीक्षक विजय ठाकर करत आहेत.
१०वी पास तोतयावर ११ गुन्हे
आदर्श म्हात्रे याचे १० वीपर्यंत शिक्षण झाले आहे. त्याने वेगवेगळ्या मॅट्रोमोनिअल वेबसाईटवर वेगवेगळ्या नावांनी अकाउंट उघडले. लग्नाचे वय उलटून गेलेल्या तसेच विधवा व मुले असलेल्या महिलांना तो लक्ष्य करत असे. त्यांना लग्नाची मागणी घालत आणि नंतर वेगवेगळी कारणे सांगून त्यांच्याकडून पैसे उकळत असे.
या पैशातून तो गोव्याला जाऊन मौजमजा करत असे. त्याला कॅसिनोचा नाद लागला होता. गोव्यातील बिग डॅडी कॅसिनोचा तो गोल्ड कार्ड मेंबर आहे. महिलेकडून घेतलेल्या पैशांपैकी २१ लाख रुपये त्याने याच कॅसिनोच्या खात्यात जमा केले होते.
पोलिसांनी ते २१ लाख रुपये जप्त केले आहेत. गेल्या काही महिन्यांपासून विवाहविषयक संकेतस्थळांवरून महिलांची फसवणूक करण्याचे प्रकार वाढले आहेत. त्यामुळे अशा संकेतस्थळांवर नावनोंदणी करताना महिलांनी खातरजमा करावी, असे आवाहन पोलिसांनी केले आहे.
