महिला बचत गटांना ५०% सवलतीत खवा युनिट मशीनचे वाटप
महाराष्ट्र न्यूज नेटवर्क
भूम : तालुक्यातील मौजे हांडोग्री येथे वॉटरशेड ऑर्गनायझेशन ट्रस्ट आणि इंडसइंड बँक अंतर्गत संपदा ट्रस्ट वॉटर यांच्या माध्यमातून उमेद जय भवानी महिला बचत गटांना ५०% सवलतीत खवा युनिट मशीन प्रदान करण्यात आले. यानिमित्त खवा प्रक्रिया उद्योगाचे उद्घाटन करण्यात आले.
या कार्यक्रमास संपदा ट्रस्टचे संचालक अनिरुद्ध मिरीकर, सरपंच उल्का मगर, वॉटरशेड ऑर्गनायझेशनचे कांतीलाल गीते, पंचायत समितीचे माजी सदस्य मुक्ताप्पा तळेकर, ग्रामसेविका नीलम जानराव, संदीप मगर आणि उपसरपंच रवींद्र लोमटे आदी मान्यवर उपस्थित होते.
संपदा ट्रस्टचे संचालक अनिरुद्ध मिरीकर यांनी मार्गदर्शन करताना सांगितले की, उमेद – महाराष्ट्र राज्य ग्रामीण जीवनोन्नती अभियानांतर्गत जय भवानी महिला बचत गटांनी या अत्याधुनिक खवा युनिटचा वापर करून अधिकाधिक नफा कमवावा.
तसेच वॉटरशेड ऑर्गनायझेशनचे कांतीलाल गीते यांनी हांडोग्री गावासाठी “पाणी अडवा, पाणी जिरवा आणि पाणी वाचवा” या संकल्पनेतून जलसंधारणासाठी अधिक प्रयत्न करणार असल्याचे सांगितले.
शेतकऱ्यांसाठी बंधारे बांधण्याबरोबरच पाण्याचे सुक्ष्म नियोजन करण्याचे आश्वासनही त्यांनी दिले. वर्षा चव्हाण (मॅनेजर, सेल्फ) यांनी उपस्थित महिलांना मार्गदर्शन करताना सांगितले की, “महिलांनी एकत्र येऊन छोटे-मोठे उद्योग सुरू करावेत, यामुळे आर्थिक स्थिती मजबूत होईल.”
तसेच तालुका व्यवस्थापक मनोज कवडे यांनी “महिलांनी दशसूत्री संकल्पना आत्मसात करून उद्योजक बनावे” असे सांगत शुभेच्छा दिल्या. कार्यक्रमाची रूपरेषा जिल्हा समन्वयक विकास गोफणे आणि भूम-परंडा समन्वयक सुजित जगताप यांनी मांडली.
आभार प्रदर्शन अनिल तळेकर यांनी केले. यावेळी भगवंत विद्यालयाचे मुख्याध्यापक सुनील डोके, लघुउद्योग सल्लागार गणेशदादा नेटके, प्रभाग समन्वयक विलास ढगे, उद्योजक कुलकर्णी जी, उद्योग सखी पार्वती साखरे, उद्योजक सागर तळेकर, प्ररेक निकिता साखरे, कमल क्षीरसागर, शिला तळेकर, अन्नपूर्णा तळेकर, वैष्णवी तळेकर, अक्षरा कुलकर्णी, वॉटरच्या सुरेखा लोमटे, राधा मगर, विद्या भरणाळे, सुवर्णा कदम, महादेवी भरणाळे, संगीता तळेकर, लक्ष्मी तळेकर यांसह बचत गटातील महिला व गावातील प्रतिष्ठित नागरिक मोठ्या संख्येने उपस्थित होते.
