१५६ संशयित ताब्यात, २१ आरोपी अटकेत : १६ गुन्हे उघड, ₹17.99 लाखांचा मुद्देमाल जप्त
महाराष्ट्र न्यूज नेटवर्क
सोलापूर : आषाढी वारी २०२५ दरम्यान, पोलीस अधीक्षक अतुल कुलकर्णी यांच्या संकल्पनेतून राबविण्यात आलेल्या “माऊली स्कॉड”च्या कार्यामुळे चोरीच्या घटना मोठ्या प्रमाणावर टाळण्यात यश आले. या स्कॉडने आतापर्यंत १५६ संशयितांना ताब्यात घेतले असून, २१ आरोपींना अटक करत १६ गुन्हे उघडकीस आणले आहेत. यामध्ये १७,९९,८००/- रुपये किमतीचा मुद्देमाल जप्त करण्यात आला आहे.
यंदाच्या आषाढी वारीमध्ये भाविकांचे सोन्याचे दागिने, मोबाईल व रोख रक्कम चोरी होणे थांबवण्यासाठी “माऊली स्कॉड” ही अभिनव संकल्पना राबवण्यात आली. सोलापूर ग्रामीण चे अपर पोलीस अधीक्षक प्रितम यावलकर यांच्या मार्गदर्शनाखाली सोलापूर ग्रामीण स्थानिक गुन्हे शाखेचे पोलीस निरीक्षक संजय जगताप यांच्या नेतृत्वाखाली स्कॉड कार्यरत होती.
या स्कॉडमध्ये स्थानिक गुन्हे शाखेतील ४ अधिकारी आणि ४१ अंमलदार तसेच पंढरपूर शहर पोलीस ठाण्यातील १ अधिकारी व १३ अंमलदार यांचा समावेश होता. हे पथक वारकरी वेशभूषेत, म्हणजेच पायजमा, कुर्ता, टोपी आणि गळ्यात पंचा अशा पोशाखात वावरत होते.
पथकास राज्यभरातील चैन तोडणारे, मंगळसूत्र व खिसे कापणारे गुन्हेगार यांची माहिती, फोटोसह डिजिटल स्वरूपात पुरवण्यात आली होती. ही माहिती मोबाईलमध्येही दिली गेली.
श्री. ज्ञानेश्वर महाराज व श्री. तुकाराम महाराज यांच्या पालख्या सोलापूर जिल्ह्यात दाखल होताच, या स्कॉडने गर्दीच्या ठिकाणी चोरी करणाऱ्यांवर बारीक लक्ष ठेवून कारवाई सुरू केली. चोरी करताना पकडलेल्या आरोपींना मुद्देमालासह ताब्यात घेण्यात आले व तत्काळ गुन्हे दाखल करण्यात आले. काही घटनांमध्ये जप्त केलेला मुद्देमाल लगेचच फिर्यादीकडे सुपुर्द करण्यात आला.
या कामगिरीतून एकूण २०० ग्रॅम सोन्याचे दागिने जप्त करण्यात आले असून, त्यामध्ये सोन्याच्या साखळ्या, मंगळसूत्र, अंगठ्या व इतर मौल्यवान वस्तूंचा समावेश आहे.
ही यशस्वी कारवाई सोलापूर ग्रामीणचे पोलीस अधीक्षक अतुल कुलकर्णी,अपर पोलीस अधीक्षक प्रितम यावलकर यांच्या मार्गदर्शनाखाली करण्यात आली. या मोहिमेत पोलीस निरीक्षक संजय जगताप यांच्या नेतृत्वात सपोनि विशाल वायकर, सपोनि नागनाथ खुणे, सपोनि विजय शिंदे, सपोनि आशिष कांबळे, पोउपनि सुरज निंबाळकर, तसेच स्थानिक गुन्हे शाखा व पंढरपूर पोलीस ठाण्यातील एकूण ५४ पोलीस अंमलदार सहभागी होते.
