१६.५ तोळे सोनं आणि ₹ ९७,५०० रोखसह एकूण ₹ ३.४५ लाखांचा मुद्देमाल हस्तगत
महाराष्ट्र न्युज नेटवर्क
बार्शी : बार्शी शहर पोलीस ठाण्याच्या गुन्हे प्रकटीकरण शाखेने एक महत्त्वाचा घरफोडीचा गुन्हा उघडकीस आणत दोन आरोपींच्या मुसक्या आवळल्या आहेत. या कारवाईदरम्यान पोलिसांनी १६.५ तोळे वजनाचे सोन्याचे दागिने व ₹ ९७,५०० रोख रक्कम असा एकूण ₹ ३,४५,००० किमतीचा मुद्देमाल जप्त करण्यात यश मिळवले आहे.
या संदर्भात बार्शी शहर पोलीस ठाण्यात गु.र.क्र. ५१६/२०२५ भारतीय दंड संहिता कलम ३०५(अ), ३३१(३), ३३१(४) अंतर्गत गुन्हा दाखल करण्यात आलेला होता. फिर्यादी सौ. दुर्गा नारायण पौळ, रा. धनगर गल्ली, कसबापेठ, बार्शी यांनी तक्रार दिली होती की, ०६/०६/२०२५ ते १७/०६/२०२५ दरम्यान त्यांच्या राहत्या घरातील कपाटातील ड्रॉवरमधून अज्ञात चोरट्यांनी ₹ ३,९७,५०० किमतीचे सोन्याचे दागिने व रोख रक्कम चोरून नेली.
या गुन्ह्याचे गांभीर्य लक्षात घेऊन पोलीस निरीक्षक बालाजी कुकडे यांच्या मार्गदर्शनाखाली गुन्हे प्रकटीकरण शाखेचे पोलीस उपनिरीक्षक उमाकांत कुंजीर व त्यांच्या पथकाला तपासाची जबाबदारी देण्यात आली. त्यांनी तांत्रिक व गुप्त माहितीच्या आधारे आरोपींचा शोध घेतला.
तपासादरम्यान ही चोरी फिर्यादींच्या घरामध्ये भाडेकरू म्हणून राहणाऱ्या सुरज बाळासाहेब झरकर (वय ३२) व माधव सोनाजी कुलकर्णी (वय २१) यांनी केल्याचे उघड झाले. दोघेही रा. हांडे गल्ली, बार्शी येथील रहिवासी आहेत.
दोन्ही संशयित आरोपींना अटक करण्यात आली असून, त्यांच्याकडे चौकशीअंती त्यांनी गुन्हा केल्याची कबुली दिली आहे. पोलिस कोठडीदरम्यान त्यांच्या ताब्यातून ₹ ३,४५,००० किंमतीचे १६.५ तोळे सोन्याचे दागिने व ₹ ९७,५०० रोख रक्कम हस्तगत करण्यात आली आहे.
ही यशस्वी कामगिरी सोलापूर ग्रामीणचे पोलीस अधीक्षक अतुल कुलकर्णी, अपर पोलीस अधीक्षक प्रितम यावलकर, बार्शी उपविभागीय पोलीस अधिकारी जालिंदर नालकुल, आणि बार्शी शहर पोलीस निरीक्षक बालाजी कुकडे यांच्या मार्गदर्शनाखाली पार पडली.
या कारवाईत गुन्हे प्रकटीकरण शाखेचे पोलीस उपनिरीक्षक उमाकांत कुंजीर, सपोफौ. अजित वरपे, पोहेकॉ. अमोल माने, बाळकृष्ण दबडे, बाबासाहेब घाडगे, पोना.संगप्पा मुळे, पोकॉ. अंकुश जाधव, धनराज फत्तेपुरे, सचिन देशमुख, राहुल उदार, सचिन नितनात, अवि पवार, प्रल्हाद अकुलवार, इसामियाँ बहिरे, चापोकॉ. रामेश्वर मस्के, चेतन झाडे, आणि सायबर पोलीस ठाण्याचे पोकॉ. रतन जाधव यांचा मोलाचा सहभाग होता. गुन्ह्याचा पुढील तपास पोलीस उपनिरीक्षक उमाकांत कुंजीर हे करत आहेत.
