दहशतवादी कृत्यांशी संबंधीत छापेमारीत सापडले अंमली पदार्थ
महाराष्ट्र न्युज नेटवर्क
पुणे : पुणे शहरातील कोंढवा परिसरात राज्य दहशतवाद विरोधी पथक (एटीएस) आणि पुणे पोलिसांनी संयुक्तपणे मोठी कारवाई केली आहे. दहशतवादी कृत्यांशी संबंध असल्याच्या संशयावरून एटीएसने कोंढवा आणि परिसरातील एकूण १९ ठिकाणी एकाचवेळी छापेमारी केली. या कारवाईमुळे संपूर्ण पुणे शहरात खळबळ उडाली आहे.
मिळालेल्या माहितीनुसार, एटीएसने ही छापेमारी अतिशय गुप्तपणे राबविली. स्थानिक पोलीस ठाण्याची मदत न घेता ही मोहीम पार पडली असून, पोलिस मुख्यालयातील बंदोबस्त तैनात करण्यात आला होता. मध्यरात्रीपासूनच कोंढवा येथील अशोका म्युज सोसायटीबाहेर मोठा पोलिस बंदोबस्त ठेवण्यात आला होता.
सूत्रांच्या माहितीनुसार, ही कारवाई काही संशयित दहशतवाद्यांच्या शोधासाठी करण्यात आली. दोन वर्षांपूर्वी याच परिसरातून बंदी असलेल्या दहशतवादी संघटनेच्या तिघांना अटक करण्यात आली होती.
त्या कारवाईतून मोठा देशव्यापी दहशतवादी कट उधळण्यात आला होता. त्या प्रकरणाचा तपास सध्या एनआयए (राष्ट्रीय तपास संस्था) करत आहे. त्या पार्श्वभूमीवर कोंढव्यात पुन्हा एकदा एटीएसच्या कारवाईमुळे परिसरात आणि शहरात सर्वत्र चर्चेला उधाण आले आहे.
