बंडगार्डन पोलिसांनी केली अटक : बड्या अधिकार्यांची घेत होता भेट
महाराष्ट्र न्युज नेटवर्क
पुणे : विशेष शाखेचे पोलीस उपायुक्त डॉ. संदीप भाजीभाकरे यांची पोलीस आयुक्तालयात भेट घेऊन आपण आयपीएस अधिकारी आहोत, तसेच परिमंडळ १ चे पोलीस उपायुक्त ऋषिकेश रावले हे माझे बॅचमेट आहेत, असे सांगितले. त्याच वेळी स्वतः पोलीस उपायुक्त ऋषिकेश रावले हे त्या ठिकाणी आले. डॉ. भाजीभाकरे यांनी विचारले, “हे तुमचे बॅचमेट असल्याचे सांगतात, तुम्ही ओळखता का?” त्यावर ऋषिकेश रावले म्हणाले, “याला मी चांगलेच ओळखतो.” त्यानंतर त्यांनी सांगितले की, “हरीद्वार येथे बनावट आयपीएस अधिकारी असल्याचे सांगून गेस्ट हाऊसची रूम बुक केल्याप्रकरणी याच्यावर गुन्हा दाखल झाला आहे.” परिणामी, पोलीस आयुक्तालयातच थेट त्या तोतया आयपीएस अधिकार्यांच्या हातात बेड्या पडल्या.
सागर ज्ञानोबा वाघमोडे (वय ३२, रा. नेरुळ, नवी मुंबई) असे या तोतया आयपीएस अधिकाऱ्याचे नाव आहे. इव्हेंटची कामे मिळवून देतो असे सांगून तो एका इव्हेंट मॅनेजमेंट क्षेत्रातील व्यक्तीची अधिकाऱ्यांशी भेट घडवून आणत होता.
याबाबत भाविक जितेंद्र शहा (वय ३७, रा. आशो पॅलफ व्हिला, घोरपडी पेठ) यांनी बंडगार्डन पोलीस ठाण्यात फिर्याद दिली आहे. हा प्रकार ३१ ऑक्टोबर रोजी दुपारी पोलीस आयुक्तालयात घडला.
पोलिसांनी दिलेल्या माहितीनुसार, सागर वाघमोडे याची पत्नी मुंबई शहर पोलीस दलात अधिकारी आहे.
भाविक शहा यांची सागर वाघमोडे याच्याशी गेल्या ३ ते ४ वर्षांपासून ओळख आहे. तो आयपीएस अधिकारी असल्याचे सांगत असे. तेव्हापासून तो शहा यांच्या संपर्कात होता. ते दोघे विविध ठिकाणी भेटत असत. तो विविध विभागांचे आयुक्त, पोलीस अधीक्षक, वरिष्ठ अधिकारी हे त्याचे परिचयाचे असल्याचे सांगत असे.
सागर वाघमोडे याने ३१ ऑक्टोबर रोजी भाविक शहा यांना फोन करून स्वारगेट मेट्रो स्टेशन येथे भेट घेतली. त्यानंतर त्याने सांगितले की, “इन्कम टॅक्स कमिशनर, पोलीस उपायुक्त भाजीभाकरे, सहायक पोलीस आयुक्त संगिता आल्फान्सो हे माझ्या ओळखीचे आहेत.
आपण त्यांना भेटू, तुझ्या मनात काही क्वेरी असतील किंवा काही कामे असतील तर तीही होतील, तसेच तुला इव्हेंटच्या संदर्भात काही कामेही मिळतील.” यानंतर ते दोघे स्वारगेट येथील इन्कम टॅक्स कार्यालयात जाऊन तेथील आयुक्त नितीन वाघमोडे यांना भेटले.
त्यानंतर लष्कर पोलीस ठाण्यातील सहायक पोलीस आयुक्त संगिता आल्फान्सो यांची भेट घेतली. पुणे महापालिकेतील अतिरिक्त आयुक्त दिवटे यांना भेटल्यानंतर ते पोलीस आयुक्त कार्यालयात आले. त्यांनी विशेष शाखेचे पोलीस उपायुक्त डॉ. संदीप भाजीभाकरे यांची पार्किंगमध्ये भेट घेतली.
त्यावेळी सागर वाघमोडे याने भाजीभाकरे यांना सांगितले की, परिमंडळ १ चे पोलीस उपायुक्त ऋषिकेश रावले हे माझे बॅचमेट आहेत. तेथे बोलत असतानाच ऋषिकेश रावले तेथे आले. डॉ. भाजीभाकरे यांनी सांगितले, “हे तुमचे बॅचमेट असल्याचे सांगतात.”
त्यावर ऋषिकेश रावले म्हणाले, “सागर वाघमोडे याबाबत मला चांगली माहिती आहे. त्याच्यावर उत्तराखंडमधील हरीद्वार येथील कोतवाली पोलीस ठाण्यात बनावट आयपीएस अधिकारी असल्याबाबत गुन्हा दाखल आहे.” यानंतर बंडगार्डन पोलिसांनी सागर वाघमोडे याला ताब्यात घेतले. पोलीस उपनिरीक्षक संदीप खेडकर तपास करीत आहेत.
