ईव्हीएम मशीन बदलल्याचा आरोप करुन सुरक्षा जाळीवर चढून केली होती घोषणाबाजी
महाराष्ट्र न्यूज नेटवर्क
पुणे : महापालिका निवडणुकीतील मतमोजणीच्या वेळी बदललेल्या ईव्हीएम मशीन आणल्याचा आरोप करत राष्ट्रवादी काँग्रेसच्या उमेदवार रुपाली पाटील ठोंबरे यांनी मतमोजणी केंद्रात आंदोलन केले. या आंदोलनादरम्यान सुरक्षा जाळीवर चढून घोषणाबाजी केल्याप्रकरणी रुपाली पाटील ठोंबरे यांच्यासह इतर उमेदवारांवर विश्रामबाग पोलिसांनी गुन्हा दाखल केला आहे.
कसबा विश्रामबागवाडा क्षेत्रीय कार्यालयातील उपअभियंता सुधीर आलुरकर यांनी याबाबत विश्रामबाग पोलीस ठाण्यात फिर्याद दिली आहे. हा प्रकार टिळक रोडवरील न्यू इंग्लिश स्कूलमधील मतमोजणी केंद्रात १६ जानेवारी रोजी दुपारी १२ वाजता घडला. या घटनेमुळे मतमोजणी केंद्रात काही काळ तणावाचे वातावरण निर्माण झाले होते.
महापालिका निवडणुकीत रुपाली पाटील ठोंबरे या राष्ट्रवादी काँग्रेसकडून प्रभाग क्रमांक २५ मधून उमेदवार होत्या. प्रभागातील मतदान केंद्रांवर ज्या ईव्हीएम मशीनवर मतदान झाले होते, त्या मशीनचे क्रमांक निवडणूक प्रतिनिधींना देण्यात आले होते.
मात्र मतमोजणीच्या दिवशी प्रत्यक्ष मतदान झालेल्या ईव्हीएम मशीनचे क्रमांक आणि मतमोजणीसाठी आणलेल्या काही ईव्हीएम मशीनचे क्रमांक जुळत नसल्याची हरकत रुपाली पाटील ठोंबरे व इतर उमेदवारांनी घेतली होती.
या हरकतीबाबत रुपाली पाटील ठोंबरे यांनी त्यांच्याकडील हरकत अर्जाची पोहोच द्यावी, अशी मागणी मतदान केंद्रावरील निवडणूक निर्णय अधिकाऱ्यांकडे केली होती. मात्र त्यांनी पोहोच न दिल्याने रुपाली पाटील ठोंबरे यांनी मतमोजणी करणारे कर्मचारी व मतमोजणी प्रतिनिधी यांच्या दरम्यान सुरक्षिततेसाठी उभारलेल्या सुरक्षा जाळीवर चढून आरडाओरडा करत घोषणाबाजी केली.
या प्रकारामुळे मतमोजणी प्रक्रियेत अडथळा निर्माण झाला. त्यांच्या हरकतीवर कोणतीही कार्यवाही होत नसल्याचे पाहून रुपाली पाटील ठोंबरे व इतर उमेदवारांनी मतमोजणीवर बहिष्कार टाकत मतमोजणी पूर्ण होण्यापूर्वीच केंद्रातून बाहेर पडले.
यानंतर या प्रकरणी विश्रामबाग पोलीस ठाण्यात गुन्हा दाखल करण्यात आला आहे. रुपाली पाटील ठोंबरे यांच्यासह इतर काही उमेदवार व प्रतिनिधींनी आरडाओरडा व गोंधळ घालून निवडणूक प्रक्रिया तसेच शासकीय कामकाजात जाणीवपूर्वक अडथळा निर्माण केल्याचा आरोप करण्यात आला आहे. या प्रकरणाचा तपास पोलीस उपनिरीक्षक तेली करीत आहेत.
