आंबेगाव पोलिसांची कारवाई; वालचंदनगरच्या गुंडावर नर्हेमध्ये कारवाई
महाराष्ट्र न्यूज नेटवर्क
पुणे : वालचंदनगर परिसरात दहशत माजवून असलेला, स्थानबद्ध कारवाई झालेला व सध्या नर्हे येथे राहणाऱ्या सराईत गुन्हेगाराला आंबेगाव पोलिसांनी पकडून त्याच्याकडून गावठी पिस्टल व दोन जिवंत काडतुसे जप्त केली आहेत.
सुयश सोमनाथ घोडके (वय २४, रा. सिद्धी हाईट्स, अभिनव कॉलेजजवळ, नर्हे) असे या सराईत गुन्हेगाराचे नाव आहे. सुयश ऊर्फ तात्या घोडके याच्यावर नातेपुते, सातारा शहर, बारामती तालुका, वडगाव निंबाळकर व वालचंदनगर पोलीस ठाण्यात जबरी चोरी, घरफोडी, खुनाचा प्रयत्न, घातक शस्त्राने मारहाण करणे, अवैध वाळू चोरी, बेकायदा शस्त्र बाळगणे असे एकूण नऊ गुन्हे दाखल आहेत.
घोडके फरार असताना तो घराला बाहेरून कुलूप लावून आतमध्ये राहत असल्याची माहिती मिळाल्यानंतर वालचंदनगर पोलिसांनी त्याला पकडले होते. त्याच्याकडून ९ सुतळी बॉम्ब, ३ पिस्टल तसेच तलवारी व कोयते जप्त करण्यात आले होते.
वालचंदनगर परिसरात दहशत निर्माण केल्यामुळे जिल्हाधिकाऱ्यांनी सप्टेंबर २०२४ मध्ये एमपीडीए कायद्यान्वये त्याला एक वर्षासाठी स्थानबद्ध केले होते. सुयश घोडके हा सध्या नर्हे येथे राहत आहे. आंबेगाव पोलीस ठाण्यातील अंमलदार ज्ञानेश्वर चित्ते व प्रमोद भोसले यांना बातमीदारांकडून माहिती मिळाली की, स्वामी नारायण मंदिराजवळील सर्व्हिस रोडवर एक व्यक्ती थांबली असून त्याच्याकडे शस्त्रे आहेत.
या माहितीची खात्री करून पोलीस उपनिरीक्षक मोहन कळमकर व त्यांच्या पथकाने सुयश घोडके याला ताब्यात घेतले. त्याच्याकडून ४१ हजार रुपये किमतीचे गावठी पिस्टल व दोन जिवंत काडतुसे जप्त करण्यात आली आहेत.
ही कारवाई पोलीस उपायुक्त मिलिंद मोहिते, सहायक पोलीस आयुक्त राहुल आवारे, वरिष्ठ पोलीस निरीक्षक शरद झिने, पोलीस निरीक्षक गजानन चोरमले यांच्या मार्गदर्शनाखाली पोलीस उपनिरीक्षक मोहन कळमकर, पोलीस अंमलदार शैलेंद्र साठे, चेतन गोरे, हणमंत मासाळ, निलेश जमदाडे, ज्ञानेश्वर चित्ते, प्रमोद भोसले, नितीन कातुर्डे, सुभाष मोरे, योगेश जगदाळे, शिवाजी पाटोळे, अजय कामठे, राकेश टेकवडे, हरिश गायकवाड, सचिन गाडे व धनाजी धोत्रे यांनी केली आहे.
