सायबर चोरट्यांनी हॉटेल मालकाच्या नावाने व्हॉटसअॅप मेसेज करून केली फसवणूक
महाराष्ट्र न्युज नेटवर्क
पुणे : बंडगार्डन परिसरातील मंगलदास रोडवरील हॉटेल कॉनरॉडचे मालक संदीप रहेजा यांच्या नावाने व्हॉटसअॅप मेसेज करून सायबर चोरट्यांनी हॉटेलच्या फायनान्स संचालकाला २० लाख ९० हजार रुपयांचा गंडा घातल्याची घटना समोर आली आहे.
याबाबत हॉटेल कॉनरॉडचे फायनान्स संचालक बीपलब चक्रबोरती (वय ५४, रा. प्रभात रोड) यांनी कोरेगाव पार्क पोलीस ठाण्यात फिर्याद दिली आहे. ही फसवणुकीची घटना ८ जानेवारी २०२६ रोजी घडली आहे.
पोलिसांनी दिलेल्या माहितीनुसार, बीपलब चक्रबोरती हे हॉटेल कॉनरॉड येथे डायरेक्टर ऑफ फायनान्स म्हणून काम करतात. ८ जानेवारी रोजी सकाळी ११ वाजता ते मंगलदास रोडवरील हॉटेल कॉनरॉडमध्ये काम करत असताना त्यांच्या व्हॉटसअॅपवर एका क्रमांकावरून मेसेज आला.
तो मेसेज हॉटेल कॉनरॉड व पाम ग्रुप बीच हॉटेल्स या कंपनीचे मालक संदीप रहेजा यांचा असल्याचे दिसून आले.या मेसेजमध्ये म्हटले होते की, “बीपलब, मी संदीप रहेजा. हा माझा पर्सनल नंबर आहे. कोणाला शेअर करू नका, सेव्ह करा.” त्यानुसार त्यांनी हॉटेल मालक संदीप रहेजा यांच्या नावाने तो नंबर सेव्ह केला.
त्यानंतर लगेच दुसरा मेसेज आला. त्यात आयटीसीकडून काही रक्कम आज आली आहे का, असे विचारण्यात आले. त्यांनी चेक करतो, असे सांगितले. त्यांनी ३५ लाख ६१ हजार रुपये येणार असल्याचे सांगितले. त्यांनी चेक केले, मात्र अशी कोणतीही रक्कम आलेली नव्हती.
“एक तासाने चेक करा,” असा त्या क्रमांकावरून मेसेज आला. त्यानंतर थोड्या वेळाने संदीप रहेजा यांच्या व्हॉटसअॅप नंबरवरून बँक डिटेल्स पाठविण्यात आल्या. अमर सिंग यांच्या खात्यात २० लाख ९० हजार ६०१ रुपये पाठविण्यास सांगण्यात आले.
तसेच पेमेंट पीजीबीएचपीएल खात्यातून करण्यास सांगण्यात आले. आपल्याशी कंपनीचे मालक संदीप रहेजा हेच बोलत असल्याचा त्यांना विश्वास बसला. त्यांनी कॉल केला, परंतु ते मिटिंगमध्ये असल्याचे सांगून कॉल करू नको, असा मेसेज आला.
कंपनीच्या व्यवहारांमध्ये नेहमीच ग्राहकांकडून पैसे येण्याबाबत चर्चा होत असल्याने बीपलब चक्रबोरती यांचा विश्वास बसला. त्यांनी दिलेल्या बँक डिटेल्सनुसार २० लाख ९० हजार ६०१ रुपये पाठविले. रक्कम पाठवल्यानंतर त्यांनी त्या व्हॉटसअॅप नंबरवर कॉल केला, मात्र कॉल उचलला गेला नाही.
त्यामुळे त्यांना संशय आला. त्यांनी कंपनीचे मालक संदीप रहेजा यांच्या मुंबई येथील कार्यालयात कॉल केला. त्यावेळी त्यांना समजले की, संदीप रहेजा यांनी कोणतेही पैसे पाठविण्यास सांगितले नव्हते. त्यानंतर आपली फसवणूक झाल्याचे त्यांच्या लक्षात आले.
त्यानंतर त्यांनी १९३० वर तात्काळ ऑनलाईन तक्रार दाखल केली. कंपनीचे मालक असल्याचे भासवून फसवणूक केल्याप्रकरणी कोरेगाव पार्क पोलिसांनी गुन्हा दाखल केला आहे. वरिष्ठ पोलीस निरीक्षक विजयकुमार डोके तपास करीत आहेत.
