चंदननगर पोलिसांची कामगिरी : ९० गुंतवणूकदारांना ३ कोटी ३९ लाखांचा गंडा
महाराष्ट्र न्यूज नेटवर्क
पुणे : शेअर मार्केटमधील गुंतवणुकीतून चांगला परतावा मिळवून देण्याचे आमिष दाखवून ९० गुंतवणूकदारांची ३ कोटी ३९ लाख १२ हजार ६३७ रुपयांची फसवणूक करून फरार झालेल्या कंपनी संचालकाला पकडण्यात चंदननगर पोलिसांना ३ वर्षांनंतर यश आले.
भारत सोपान पठारे (वय ३०, रा. नाऊरगाव, ता. श्रीरामपूर, जि. अहिल्यानगर) असे अटक करण्यात आलेल्याचे नाव आहे. याप्रकरणी चंदननगर पोलीस ठाण्यात २०२३ मध्ये ठेवीदार हितसंबंध संरक्षण अधिनियमाखाली गुन्हा दाखल करण्यात आला होता.
भारत पठारे याने एफ ट्रेड सेल्स एजन्सी प्रा. लि. या कंपनीची मुंबईतील बोरीवली व खराडी येथे कार्यालये सुरू केली होती. गुंतवणूकदारांना चांगला परतावा देण्याचे आमिष दाखवून त्यांना आपल्या कंपनीत गुंतवणूक करण्यास प्रवृत्त केले.
भारत पठारे याने सुरुवातीला थोड्या प्रमाणात परतावा देऊन लोकांचा विश्वास संपादन केला. दोन महिन्यांत ९० गुंतवणूकदारांनी ३ कोटी ३९ लाख १२ हजार ६३७ रुपयांची गुंतवणूक केली. सप्टेंबर २०२१ ते ३१ ऑक्टोबर २०२३ दरम्यान लोकांनी गुंतवणूक केली. त्यानंतर भारत पठारे गाशा गुंडाळून फरार झाला होता.
चंदननगर पोलिसांनी याप्रकरणी त्याची पत्नी व कंपनीतील एका व्यक्तीला त्या वेळी अटक केली होती; मात्र भारत पठारे सापडत नव्हता. भारत पठारे हा नाशिक भागात असल्याची माहिती चंदननगर पोलिसांना मिळाली.
त्यानुसार स्थानिक पोलिसांच्या मदतीने पठारे याला नाशिक येथील पाथर्डी फाटा परिसरातून ताब्यात घेऊन अटक करण्यात आली. ही कामगिरी अपर पोलीस आयुक्त मनोज पाटील, पोलीस उपायुक्त सोमय मुंडे, सहायक पोलीस आयुक्त प्रांजली सोनवणे यांच्या मार्गदर्शनाखाली वरिष्ठ पोलीस निरीक्षक निलेश बडाख, सहायक पोलीस निरीक्षक सचिन साळवे, पोलीस हवालदार गुरव, घावटे, घाडगे तसेच पोलीस अंमलदार बेंद्रे यांनी केली.
