वाखरी पालखी तळ, भक्ती सागर, दर्शन रांग व मंदिर परिसरातील सुविधांचा आढावा : गर्दी नियंत्रणावर भर
महाराष्ट्र न्यूज नेटवर्क
पंढरपूर (जि. सोलापूर): पंढरपूर (जि. सोलापूर) येथे आषाढी शुद्ध एकादशी सोहळा २५ जुलै २०२६ रोजी होणार असून, या सोहळ्यासाठी श्री ज्ञानेश्वर महाराज (आळंदी), संत तुकाराम महाराज ( देहू) यांच्या पालखी सोहळ्यांसह इतर संतांच्या पालख्या मोठ्या प्रमाणात पंढरपुरात दाखल होतात. या कालावधीत लाखो वारकरी भाविक सहभागी होत असल्याने त्यांना अधिकाधिक सुविधा उपलब्ध व्हाव्यात, या उद्देशाने जिल्हाधिकारी एस. कार्तिकेयन यांनी विविध ठिकाणांची पाहणी केली.
वारी कालावधीत गर्दी नियंत्रणासाठी वाखरी येथे वॉच टॉवर उभारण्याच्या सूचना त्यांनी दिल्या. तसेच भक्ती सागर परिसरात हायमास्ट दिव्यांची संख्या वाढवून प्रकाशयोजना सुधारण्याचे निर्देश दिले. भाविकांना पायाभूत सुविधा सहज आणि सुलभ पद्धतीने उपलब्ध व्हाव्यात, यावर त्यांनी भर दिला.
यावेळी प्रांताधिकारी सचिन इथापे, उपजिल्हाधिकारी संतोषकुमार देशमुख, सहाय्यक पोलीस अधीक्षक प्रशांत डगळे, मंदिर समितीचे कार्यकारी अधिकारी राजेंद्र शेळके, कार्यकारी अभियंता अमित निमकर, तहसीलदार सचिन लंगुटे, जिल्हा नियोजन अधिकारी दिलीप पवार, गटविकास अधिकारी अमोल जाधव, मुख्याधिकारी महेश रोकडे, तालुका आरोग्य अधिकारी डॉ. एकनाथ बोधले, वैद्यकीय अधीक्षक डॉ. सरडे, तसेच पुरातत्त्व विभागाचे सहाय्यक संचालक विलास वहाने आणि इतर संबंधित विभागांचे अधिकारी उपस्थित होते.
प्रांताधिकारी सचिन इथापे व मुख्याधिकारी महेश रोकडे यांनी वाखरी पालखी तळ, भक्ती सागर (६५ एकर) आणि नदीपात्र परिसरातील सुविधांची माहिती दिली. मंदिर समितीचे कार्यकारी अधिकारी राजेंद्र शेळके यांनी आषाढी यात्रेदरम्यान भाविकांची मोठी गर्दी होत असल्याने दर्शन रांगेत विश्रांती कक्ष उभारले जात असल्याचे सांगितले.
तसेच दर्शन प्रक्रिया जलद व सुलभ व्हावी यासाठी करण्यात येणाऱ्या नियोजनाची माहिती देत प्रस्तावित दर्शन मंडपाबाबतही माहिती दिली. श्री विठ्ठल-रुक्मिणी मंदिराचे संवर्धन काम पुरातत्त्व विभागाच्या मार्गदर्शनाखाली सुरू असून, त्या कामाचीही जिल्हाधिकाऱ्यांनी पाहणी केली. पाहणीदरम्यान जिल्हाधिकाऱ्यांनी वाखरी पालखी तळ, विसावा मंदिर, भक्ती सागर (६५ एकर), रिद्धी-सिद्धी दर्शन मंडप, दर्शन रांग, स्काय वॉक, चंद्रभागा वाळवंट, ज्ञानेश्वर दर्शन मंडप तसेच मंदिर परिसराची सविस्तर पाहणी केली.
