महाराष्ट्र न्यूज नेटवर्क
पुणे : महापालिका निवडणुकीनंतर परवानगी नसताना जनता वसाहत परिसरात मिरवणूक काढणाऱ्या राष्ट्रवादी काँग्रेसच्या नवनिर्वाचित नगरसेवकावर पर्वती पोलिसांनी गुन्हा दाखल केला आहे.
सुरज नथुराम लोखंडे (वय ४५, रा. दत्त मंदिर, जनता वसाहत, पर्वती) असे गुन्हा दाखल झालेल्या नगरसेवकाचे नाव आहे. याबाबत पोलीस अंमलदार काटकर यांनी पर्वती पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, महापालिका निवडणुकीत प्रभाग क्रमांक २८ जनता वसाहत येथून सुरज लोखंडे हे २२८ मतांनी निवडून आले. त्यांनी भाजपच्या विनया प्रसाद बाहुलीकर यांचा पराभव केला.
मतमोजणीनंतर मिरवणूक काढण्यास बंदी होती. असे असताना सुरज लोखंडे यांनी मिरवणूक काढण्याची परवानगी मागितली. मात्र पोलिसांनी त्यांना परवानगी नाकारली. त्यावेळी त्यांनी पोलिसांना फक्त घरोघरी जाऊन भेटणार असल्याचे सांगितले.
असे असतानाही जनता वसाहतीतील जय भवानीनगर येथे सायंकाळी साडेसात वाजता त्यांनी १०० ते १५० जणांना एकत्र करून मिरवणूक काढली. पोलीस उपायुक्त, विशेष शाखा यांच्या आदेशाचा भंग केल्याबद्दल गुन्हा दाखल करण्यात आला आहे. पोलीस हवालदार आदक तपास करीत आहेत.
